POPArticles
2300 views

兼職做全職爸爸(暫別篇)

Sep 14, 2017

兼職做全職爸爸的生活,「始」於工人姐姐的一句「bye bye sir」,「終」於新工人姐姐的一句「Hello sir」。以為會鬆一口氣,但一打二再work from home,已經忙到爆煲嘅筆者,聽到久違了的英文,心裡竟然絲毫沒半點興奮,仲有一點點的失落──這個全職爸爸的旅程,已來到尾聲。(當然,失落還失落,暫時我都唔想再聽到「bye bye sir」。)

 

經過兩個多月與兩個女兒的緊密接觸,筆者其實已經慢慢更習慣她們的步伐,更了解她們的喜好,更懂得與她們的溝通,更清楚她們的脾氣,更領會了上天為何安排了一個這樣的機會讓我與女兒們更親近。

 

由換條片都雞手鴨腳,到老婆叫我做「換片閃電手」,舊片同新片交替只有0.1秒的誤差。想斟茶俾爹哋?等你結婚先啦!由唔識紮頭髮,到可以自創「free style」新髮型,敢話無人可以抄襲到,因為自己第二日都紮唔番。由一個女係度喊一個女係咁叫爹哋,煩到頭頂冒煙,到學識「左右互搏」,左手同細女玩,右手同大女做暑期作業。有幾次仲要同時同老細電話會議,實行一心三用,比「老頑童」更高一級。由日日打仗咁樣先趕到校巴,到仲有時間扮cool係校巴站同人地爺爺嫲嫲阿媽吹水,打聽學校資訊。仲有,就好似《少林足球》裡的「身為汽車維修員身上有士巴拿係好正常嘅」一樣,「身為爸爸,個背包總有兩條片、換片墊、乾濕紙巾各一包,沙巾幾條、奶瓶、奶粉、熱水、凍水、後備衫,都係好正常」。

 

兩個多月,轉眼間就過去,今天是最後一天work from home,筆者決定豪俾公司,請咗一日假,專心與女兒共渡這全職爸爸的last day。像平常一樣,你在校巴裡對著爹哋揮手說再見,想起明天你起床前我已出門返工,這次的別離感覺特別漫長,心裡亦特別傷感。像平常一樣,在校巴站接你,你會輕吻爹哋,讓筆者拖著大情人,抱著小情人漫步回家。像平常一樣,回到家裡,我們來一段親子時光,才開始功課時間及預備晚餐。平常不過的一日,今天卻有與別不同的感覺,要離開這個工作崗位,原來萬般不捨。

 

筆者愛上了全職爸爸這一份工,可以說是源於對女兒的愛。三人行,就像連體嬰一樣,補償了爸爸沒有十月懷胎這個空白期,這種感覺實在是非筆墨能確切形容得了。

 

「妳,喜歡爹哋整天陪著嗎?」很想聽到她大聲的說「喜歡」,但實在問不出口,因為就算喜歡,家裡的經濟不能只靠太太一人支撐。面對工作與家庭,筆者只好「身在曹營心在漢」。有幸能當真正全職爸爸或媽媽的各位,請相信,你的子女一定會覺得很幸福,將來亦會明白你對他們無私的付出。


作者:科豆,科學與老豆的合成體,喜歡與太太及女兒一同成長,遇到教女難題會上網找文獻的一個中年科學爸爸。

yes