POPArticles
356 views

你快樂,因為我快樂

Sep 07, 2017

為了打點小孩及家庭事,父母好多時都唯有選擇放棄自我,為的就是要演好父母親這個角色!

 

俾小朋友激到飛天?唔緊要,深呼吸幾下,放下怒氣,心平氣和教。

 

俾小朋友煩到出煙?飲杯冰水,降降溫,將佢係度煩嘅野逐一擊破,令他平靜下來!

 

總之,就好似《喜劇之王》咁,無論幾咁難演,小導演(你個仔女)一日未嗌Cut(瞓著咗),父母們都要撥熄心中嗰團怒火,將父母溫柔善良的性格完美演落去!

 

就算有時覺得好攰,有時覺得好唔開心,都要忍住……跟住,仲同自己講,諗多啲開心野啦,諗下BB成日笑,再諗下將來囡囡大個咗嘅自由自在……好似開心咗啲喎,原來情緒垃圾,就係咁被埋藏在心深處。

 

其實,大人同小朋友一樣,將負面情緒隱藏,只會離開心的道路越來越遠。好多專家或網上平台,都告訴父母教養孩子,要先明白小朋友的情緒,再去教佢點去面對問題。但係大人又有無去明白同好好咁處理自己嘅情緒?

 

一個來至以色列的研究發現,原來成年人要快樂,都必先學懂如何面對及釋放自己的情緒。研究有來自8個不同國家的2千幾個大學生,佢發現其實把感覺隱藏而只懂尋找歡樂的人,並不一定最快樂,反而懂得去傷心,懂得去憤怒,懂得去憂愁先可以真正擁有快樂。

 

當然,俾自己傷心唔係叫你事事悲觀,容許自己憤怒亦唔係指你可以破口大罵發脾氣,筆者認為作為父母,我地必須控制自己情緒,這個完美父母角色還得盡力去演,只係任由情緒長期被抑壓,臨界點終有一天會降臨,然後,情緒崩潰後失去理智,做出破壞性及愧疚的行為,不出為奇。所以,筆者覺得,父母更加要適時用啱嘅方法清理自身的情緒垃圾。

 

湊小朋友攰到唔開心,對住你信任嘅人傾吐,甚至來大哭一場,將傷心的情感釋放,又有何不可?俾小朋友激親,搵日去打下泰拳,用沙包將怒氣發洩,又有何不對?

 

你又有甚麼方法去處理情緒垃圾﹖也不妨分享一下,讓大家多作參考。

 

老實說,連自己嘅情緒都不去處理,又點樣處理小朋友嘅情緒呢?更遑論教佢認識自己嘅情緒。你自己都唔開心,小孩又點會開心?有快樂父母,才有快樂小孩,你們認同嗎?


作者:

科豆,科學與老豆的合成體,喜歡與太太及女兒一同成長,遇到教女難題會上網找文獻的一個中年科學爸爸。

 

資料來源:

Supplemental Material for The Secret to Happiness: Feeling Good or Feeling Right? (2017). Journal of Experimental Psychology: General. doi:10.1037/xge0000303.supp

yes