POPArticles
274 views

我不需要模範孩子

Nov 28, 2017

從小,女兒都很抗拒嘗試新事物。要佢試食新嘢,從來不易。就算佢食咗入口,都會吐番出黎,有時仲要好似「機關槍掃射」咁…不過筆者最怕唔係佢唔肯試食新嘢,而係啲人成日問﹕「點解佢好似乜都唔係好食嘅?」「放咗入佢個口先啦,入咗個口佢一定會覺得好食,啲嘢都係迫番黎!」「無理由唔食架,小朋友好鍾意架喎,而且好有益架嘛!」有時都真係忍唔住想問,唔啱口味,唔想食,唔係好正常嘅事咩?就算有時自己個「mood」差啲,食量都會大減啦!

 

而且,研究都有話鍾唔鍾意試新嘢可以係天性嚟喎!美國科羅拉多大學同賓夕法尼亞州立大學就對6至18個月大既嬰孩作研究,發現有一班小朋友對新嘢特別有興趣,但亦都有一班對新嘢就不感興趣。最神奇係佢地發現無興趣試食新嘢嘅小朋友,就連玩玩具都唔鍾意新嘢,反而鍾意啲自己玩開嘅玩具。換個講法,佢地唔肯試新嘢,但就好長情。

 

負責該項研究的大學教授Cynthia Stifter就指出,BB係嬰孩時期已經有自己嘅性格,有些會較為外向熱情,喜歡接觸新事物,而有些則較內向冷靜,對新事物有所保留。而性格並唔係短時間就可以轉變,古語都有云「三歲定八十」,呢個研究就發現咗BB對新事物嘅好奇心係「12個月定18個月」,佢對新嘢無好奇心就係無好奇心,真係迫都迫唔黎架!Professor Stifter表示,家長應接受自己小孩與生俱來的性格,就算真的需要改變,亦要有足夠耐性,慢慢引導小孩去接受新事物。

 

所以,筆者從來都唔迫阿女食嘢,但咁唔表示放棄叫佢試新嘢只係會諗多啲「迫」以外嘅方法,例如同佢一齊食、响佢面前表現到樣嘢食好好味、用獎勵計劃、用故事形式……總之各適其適。結果?試十次八次可能有一次成功。終極竅門係乜?兩個字:「耐性」。

 

「其他小朋友怎樣怎樣」已經聽得太多,我的小孩並不是其他小朋友,我相信我的小孩就是與眾不同。每個小孩,都有自己的個性,性格亦有兩面。好奇愛刺激的不一定有耐性,抗拒新事物的卻有可能更長情。

 

獨一無二,就是我們愛他而不是其他小孩的原因吧!


作者:科豆,科學與老豆的合成體,喜歡與太太及女兒一同成長,遇到教女難題會上網找文獻的一個中年科學爸爸。

 

資料來源:Penn State. (2017, August 2). Food fight: Children's temperaments help predict dinnertime struggles. ScienceDaily. (https://goo.gl/n7GNC9

yes